माउन्ट एभरेष्ट पावर डेभलपमेन्ट लिमिटेडले आज, वैशाख १७ गतेदेखि साधारण शेयर (आईपीओ) निष्काशन तथा बिक्री खुला गरेको छ। कम्पनीले यो आईपीओ विशेषगरी आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपाली नागरिकहरूलाई लक्षित गरेको छ।

कम्पनीले कुल जारी पूँजी ८६ करोड रुपैयाँको ३० प्रतिशत अर्थात् २५ करोड ८० लाख रुपैयाँ बराबरको २५ लाख ८० हजार कित्ता शेयर निष्काशन गर्ने अनुमति पाएको थियो। यसमध्ये ८ करोड ६० लाख रुपैयाँ बराबरको ८ लाख ६० हजार कित्ता शेयर आयोजना प्रभावित क्षेत्रका स्थानीय बासिन्दाहरूका लागि छुट्याइएको छ। यो शेयरमध्ये ३ लाख ४४ हजार कित्ता शेयर अति प्रभावित क्षेत्र, सोलुखुम्बु जिल्लाको सोलुदुधकुण्ड नगरपालिकाका वडा नं. १ र २ का बासिन्दाहरूलाई बाँडफाँट गरिनेछ भने बाँकी ५ लाख १६ हजार कित्ता शेयर सोही नगरपालिकाका अन्य वडाहरूका स्थायी बासिन्दाहरूलाई वितरण गरिनेछ।

यसैगरी, सर्वसाधारण लगानीकर्ताहरूका लागि छुट्याइएको शेयरको १० प्रतिशतले हुन आउने १ करोड ७२ लाख रुपैयाँ बराबरको १ लाख ७२ हजार कित्ता शेयर श्रम स्वीकृती प्राप्त गरी विदेशमा कार्यरत नेपाली नागरिकहरूका लागि छुट्याइएको छ।

यो आईपीओमा न्यूनतम १० कित्ताका लागि आवेदन दिन सकिनेछ भने अधिकतम १० हजार कित्तासम्म आवेदन गर्न सकिने व्यवस्था छ। आयोजना प्रभावित क्षेत्रका स्थानीय बासिन्दाहरूका लागि आईपीओ निष्काशन प्रक्रिया वैशाख ३१ गते बन्द हुनेछ, जसको अन्तिम म्याद जेठ १८ गतेसम्म रहनेछ। वैदेशिक रोजगारीमा रहेका नेपालीहरूका लागि भने यो प्रक्रिया वैशाख २३ गते बन्द हुनेछ, जसको अन्तिम म्याद वैशाख ३१ गतेसम्म तोकिएको छ।

आईपीओ निष्काशनका लागि गरिएको रेटिङ्गमा केयर रेटिङ्ग नेपालले कम्पनीलाई ‘केयरएनपी डबल बी प्लस इस्यूअर रेटिङ्ग’ प्रदान गरेको छ, जसले कम्पनीको दायित्व बहन गर्ने क्षमतामा मध्यम जोखिम रहेको सङ्केत गर्छ। यस आईपीओको निष्काशन तथा बिक्री प्रबन्धक एनआईएमबि एस क्यापिटल लिमिटेड रहेको छ।

आयोजना प्रभावित क्षेत्रका स्थानीय बासिन्दाहरूले माछापुच्छ्रे बैंक, नेपाल बैंक, प्रभु बैंक र एनएमबि बैंकका सल्लेरी, सोलुखुम्बु शाखा कार्यालयहरूबाट आवेदन दिन सक्नेछन्। साथै, नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थाहरूका तोकिएका शाखा कार्यालयहरूबाट पनि आवेदन बुझाउन सकिनेछ। शेयर खरिद दरखास्त फाराम प्राप्त गर्नका लागि स्थानीय बासिन्दाहरूले २ रुपैयाँ शुल्क बुझाउनुपर्नेछ।

वैदेशिक रोजगारीमा रहेका नेपालीहरूले भने नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थाहरूका तोकिएका शाखा कार्यालयहरूबाट सि आस्बा प्रणालीमार्फत आवेदन दिन सक्नेछन्। यसका अतिरिक्त, सिडिएस एण्ड क्लियरिङ्ग लिमिटेडको सफ्टवेयर ‘मेरो सेयर’ अनलाइन प्रयोग गरी पनि आवेदन गर्न सकिनेछ।